क्विक हिल या आघाडीच्या अँटिव्हायरस कंपनीने नुकत्याच या वर्षीच्या तिसऱ्या तिमाहीचा अहवाल सादर केला आहे. यामध्ये विंडोज सिस्टिमच्या तुलनेत कंपनीने डिटेक्ट केलेल्या अँड्रॉइड व्हायरसची संख्या लक्षणीयरीत्या वाढल्याचे दिसत आहे. तसेच, गेल्या दोन तिमाहींचा विचार करता अँड्रॉइड सिस्टिमच्या व्हायरसमध्ये वाढ होत असल्याचे आढळते. या वर्षी पहिल्या तिमाहीत क्विक हिलला अँड्रॉइडमध्ये आढळलेले व्हायरस ४ लाखांच्या घरात होते. दुसऱ्या तिमाहीत ही संख्या दहा लाखांवर पोहोचली, तर तिसऱ्या तिमाहीमध्ये व्हायरसनी १२ लाखांचा टप्पा ओलांडला. एकट्या सप्टेंबर महिन्यात क्विक हिलला व्हायरसचे ४ लाख ३५ हजार ९७० नमुने सापडले.
अँड्रॉइड सिस्टिममध्ये आढळणाऱ्या व्हायरसमध्ये अँड्रॉइड व्हायजर या व्हायरसचा वाटा सर्वाधिक (५३.४० टक्के) आहे. यापूर्वीच्या दोन तिमाहींमध्येही हाच व्हायरस अँड्रॉइड युजर्सना सर्वाधिक त्रास देत होता. गुगल प्लेवरील अॅप्स वापरणाऱ्यांना या व्हायरसचा धोका असून तो मोबाइल अॅडवेअरच्या रूपात सिस्टिममध्ये प्रवेश करतो. या व्हायरसमुळे मोबाइलवर अनावश्यक जाहिराती दिसू लागतात. त्याचप्रमाणे, हा व्हायरस मोबाइलचे ठिकाण (डिव्हिइस लोकेशन) व आयएमईआय नंबरही हॅक करतो. या व्हायरसला सिस्टिममधून नष्ट करण्यासाठी इनस्टॉल केलेले अॅप पूर्णपणे सिस्टिममधून काढून टाकावे लागते. व्हायजरखालोखाल अँड्रॉइड डॉजिन हा व्हायरस आढळला (२८.३० टक्के) आहे. हा व्हायरस नव्यानेच सापडला असून तो सिस्टिमवरील माहिती चोरतो. त्याचप्रमाणे सबस्क्रायबर आयडी, मोबाइलची लोकेशन इत्यादी माहितीही या व्हायरसच्या भक्ष्यस्थानी पडत असल्याचे क्विक हिलने म्हटले आहे. अँड्रॉइड कूगॉस, एसएमएस थीफ, एअरपुश, फोबस हे अन्य व्हायरसही कमी अधिक प्रमाणात सिस्टिममध्ये आढळले आहेत.
यापुढे व्हायरसचा धोका हा ऑनलाइन शॉपिंगबरोबर मोबाइलवरून केल्या जाणाऱ्या बँकिंग व्यवहारांना असल्याचेही क्विक हिलने म्हटले आहे. युजरचा बँकिंग आयडी व अन्य गोपनीय माहिती चोरण्यासाठी पुढील काळात व्हायरसद्वारे प्रयत्न होऊ शकतात. तसेच, गेम्स व सोशल नेटवर्किंग अॅप्समधूनही व्हायरस सिस्टिममध्ये प्रवेश करण्याची शक्यता आहे. खबरदारी म्हणून युजरनी मोबाइलवरून खरेदी करताना शॉपिंग वेबसाइटच्या अधिकृत अॅप्सचाच वापर करावा, ई-मेलद्वारे पाठवल्या जाणाऱ्या लिंक्स वा यूआरएलच्या साह्याने खरेदी करू नये, ऑनलाइन शॉपिंगसाठी वेगवेगळी कार्डे न वापरता एकाच कार्डाने खरेदी करावी, आदी प्राथमिक सूचना कंपनीने केल्या आहेत.
-maharashtratimes
