बालदिनी गुगलवर पुण्याच्या वैदेहीचे डुडल

'चित्रकला हेच आयुष्य आहे' असे म्हणणारी पुण्याची वैदेही रेड्डी गुगल डुडलच्या राष्ट्रीय स्पर्धेची विजेती ठरली आहे. वैदेहीने आसामवर काढलेले डुडल बालदिनी दिवसभर गुगलच्या वेबसाइटवर दिसणार आहे. तर पनवेलच्या डीएव्ही पब्लिक स्कूलमधील सर्वज्ञा मिरीयाला तिच्या गटात पहिली आली आहे.

पहिली ते तिसरी, चौथी ते सातवी आणि आठवी ते दहावी अशा तीन गटात यंदाच्या सहाव्यावर्षी देशभरातील १७०० शाळांमधील सुमारे १० लाख विद्यार्थी गुगलच्या या स्पर्धेत सहभागी झाले होते. 'मला जायला आवडेल असे भारतातील ठिकाण', असा विषय त्यांना देण्यात आला होता. प्रत्येक गटातून चार याप्रमाणे १२ जणांची अंतिम फेरीत निवड करण्यात आली होती. त्यातील अंतिम आणि गटनिहाय विजेत्यांची घोषणा बुधवारी दिल्लीत करण्यात आली. स्पर्धेतील सर्वसाधारण विजेतेपद पुण्याच्या आर्मी पब्लिक स्कूलमध्ये नववीत शिकणाऱ्या वैदेही रेड्डी हिला मिळाले. तिने आसामवर डुडल काढले होते. तर पहिली ते तिसरी या गटात पनवेलच्या डीएव्ही पब्लिक स्कूलमध्ये दुसरीत शिकणाऱ्या विजेत्या सर्वज्ञाने केरळवर डुडल काढले होते. अंतिम फेरीतील सर्वांना क्रोमबुक लॅपटॉप, सर्टिफिकेट देण्यात आले असून, राष्ट्रीय विजेत्याला पालकांसह त्यांनी डुडल काढलेल्या ठिकाणी फिरायला जाण्याची संधी मिळणार आहे.

'चित्रकला हेच आयुष्य'

चित्रकला हा माझा छंद नसून ते माझे आयुष्यच असल्याचे स्पर्धेतील राष्ट्रीय विजेती वैदेही रेड्डी सांगते. लष्करात लेफ्टनंट कर्नल असलेले ईश्वर रेड्डी आणि भारती विद्यापीठात काम करणारी तिची आई गायत्री रेड्डी या दोघांनाही चित्रकलेची आवड आहे. या दोघांनाही चित्रकलेची आवड असून, तिची आई तर वॉल म्युरलही काढते. भविष्यात तिला चित्रकलेतच करिअर करायचे असून, गुगल किंवा अमरचित्र कथा तयार करणाऱ्या कंपनीत काम करायला आवडेल, असे ती म्हणते.

-maharashtratimes